كي نقولو سيدي رمضان نقولو خبز

سيدي رمضان عند التوانسة حافل بعادات زمنية من حشيشة رمضان، لحلو السهرية، للبسة التقليدية، لكلها حكايات تعيشنا أجواء العائلة التونسية ومن بين الحكايات علاقة التونسي بالخبز إلّي خلاتو معروف

في كل عشية من أيام سيدي رمضان تلقا التوانسة صفوف
التونسي يضرب ساعة قدام كوشة الحومة على خبز سخون ملهوف
وفينا إلّي يبعد عالكوشة ويلوج على خبز طابونة مفوّح وبنين
يوصّي الجارة باش تقراولو حسابو كلّ يوم في خبزتين
هذاكة علاش يقولو إلّي الشعب التونسي أكثر شعب يستهلك الخبز توة سنين
زعمة شنوة حكاية الخبز في بلادنا وتاريخو يبدى منين؟
ظهر الخبز في تونس قبل الفينيقيين وأنواعو تفوت العشرين
ونزيدو انوروكم إلّي هالأنواع على الجهات التونسيّة مقسمين
نلقاو خبز الشواي، شواي الطبق، شواي القاع، القاليط، المجمع ، القرص، الملة، المطبقة، المحجوبة، المبسس، القربودي، الحلوزي وخبز الغناي وإلاّ كيما يسميوه بخبز الطاجين
ومن أقدم الأنواع نلقاو خبز الطابونة وأشهرهم خبز الملاوي إلّي يجمع بين الولايات ويخليّ تونس والمغرب والجزائر متحدين
 وكيما تقول مماتي يرحمها، منين هاك العرف؟ من هاك الشجرة !! وتونس ديما في قلب المغرب الكبير
إنشاء الله رمضانكم مبروك وكل عام حيين بخير