مقرونة ببوش محشية بالشامبينيون

رغم إلّي عجينة وفي ماكلتها تتسمى رزينة... المقرونة عزّ الماكلة عند التوانسة، وتلقاها أنواع وأشكال تقول منافسة، واليوم المتسابقة الجديدة مقرونة ببوش محشية بالشامبينيون

المقادير

• 1 راس بصل مقصوص جويد
• 1 مغرفة كبيرة طماطم معجونة
• 1 كوب ماء
• 1/2 مغرفة صغيرة زعتر شايح
• 1 مغرفة صغيرة فلفل أكحل
• 1 مغرفة كبيرة ملح
• 1 صحفة زيت زيتونة
• 5 فصوص ثوم مهرّس
• 3 كعبات طماطم مقشّرة
• 1 باكو مقرونة ببوش
• 100 غرام جبن مرحي
• 1/2 كأس موزاريلا
• 1/2 كأس كرام فراش

• طريقة التحضير

  • 1 - اسمط المقرونة في الماء + رشة ملح + قطرة زيت
  • 2 - حطّ في الخلاط: الطماطم المقشرة + الثوم + كاس زيت زيتونة + رشة ملح + رشة فلفل أكحل + زعتر + ماء + طماطم معجونة
  • 3 - حطّ الخليط في طنجرة وخليه يغلي لين يخثر
  • 4 - قلّي في طنجرة أخرى: بصل + ثوم + شامبينيون + رشة ملح + رشة فلفل أكحل لمدة 3 دقائق
  • 5 - صفي المقرونة وخليها تبرد
  • 6 - صب الصلصة في طبق الفور
  • 7 - أحشي المقرونة بالكعبة بالكعبة: مغرفة كرام فراش + مغرفة خليط الشامبينيون
  • 8 - صفف كعبات المقرونة فوق الصلصة
  • 9 - أعمل فوق المقرونة المصففة رشة موزاريلا + رشة جبن مرحي ودخل الطبق للفور مدة 20 دقيقة

  • نصيحة الشاف

    ما تخليش المقرونة برشة وقت بعد ما تصفيها باش ما تلصقش بعضها