عوضّ مواد التنظيف بقشور القوارص وتمتّع بريحة بنينة

في العادة قشور البرقدان نعملو بيهم قهيوة عربي ريحتها فاوحة تعمل الكيف، أمّا كيف تلقى إلّي قشور القوارص قاهرة للدهون، وتنحّي الزيوت مالماعون والحيوط، تولّي تقرالها حسابها أكثر وتعوّض بيها مواد التنّظيف في الكوجينة وتخلّي ريحتها بنينة

الفكرة تقول إنّك تلمّ قشور القوارص (كيما البرقدان، القارص، المدالينة وغيرها) في دبوزة بلاّر تعبّيها بالخلّ وتخليها على جنب مدّة جمعتين.

بعد ما توفى المدّة المحدّدة، وتكون القشور عطات مفعولها، فرّغ الخل في دبوزة فيها بخّاخ، ترشّ بيها الماعون والبقايع المسخّة في كوجينتك.

وهكّة تكون نظّفت كوجينتك بمواد طبيعيّة، ريحتها فاوحة وما تقلّقش